|
لسة فاكرة تجمعاتنا كل يوم خميس ، تجمعنا العائلي واحنا بنتفرج على (عائلة ونيس) ، لسة فاكرة صوتنا واحنا بنلعب خلاويص ، لسة ف بالي أيامنا و ضحكنا اللي ملوش زي ، لسة في بالي و لسة في قلبي حيّ .
لسة فاكرة .
*****************************************
لسة فاكرة كل صورة جمعتنا من أيام زمان ، السنين اللي مرت و دوّبت في البيت الحيطان ، لسة شاهدة كل اوضة عن طفولة "كان ياما كان" ، لسة كل شِبر بيحكي اللي كان ، كل شارع من الحواري بيضم ريحة من زمان ، لسة حتى الأغاني بتضم بحنان ، فيروز الصبح مع القهوة ، و حدوته قبل النوم تدينا الأمان ، اما دلوقتي ع المخدة ، بتحتوينا كل يوم الأحزان ،
*****************************************
لسة فاكرة كل ساعة و كل ثانية مرت ، حاسة انها كانت أصعب أيام عدت ! ازاي أيام الفراق عدت واحنا لسة مكملين؟ كل ذكرى بينا سدت ، وجع هيدمرنا سنين ، كل خطوة فيها ننجح ، نجري نحكي لمين؟ مفيش! ، لسة كل يوم بندور على طيفكم منلاقيش ، كنا زمان لو خطوة عدت ، نروح نحكيها كأنهم السبب في أننا نعيش ، لسة فاكرين الأيام ، ولسة الذكريات مش هتنسانا ، لسة بنكبر و بتمر السنين ، و لسة الذكريات بتكبر معانا ، لسة كل ثانية بتعدي ، بنحن فيها للي فات ، ولسة كل ذكرى بتعشش اكتر جوانا ، لسة في كل يوم بنعدي مسافات ، و تايهين ما بين نخطي و نكمل او نموّت الحنين معانا ،
*******************************************
طب لسة فاكرة الحضن إياه ، اللي كان بيصالحني من قسوة الحياة ، وكان يوم ما اعيط من الخوف ، ألاقي صوته بيطمني معاه، ازاي أنساه ؟؟ آخر لقاء بينا كان محجوز هناك ، لسة فاكرة كل كلمة قالها ، حسيت انه خلاص مفارق يومها، طب ازاي تفارق وأنا قلبي لسة معاك؟ كان بيصلي وهو خلاص بينام ، كان جميل بشكل ميوصفوش كلام! طب انا ملحقتش حتى أقوله سلام!!!!!! ازاي مش هيكون هناك؟ كنت ماسكة ايده وهي بردانة ، وهو بيطمني انه هيكون في مكان كويس! و انه هيكون حوالينا و معانا! لسة فاكرة يوم ما جم قالولي مات ! لسة صوته بيرن في وداني! عدا على فراقه ١٠ سنين ...، ولسة مش عارفه اتعود ، لسة واقفة مكاني . لسة بكلمه في سري كل يوم يعدي ، كان جميل بشكل كأنه بيوعدني مش هيسبني لوحدي! راح للجنة وساب الدنيا ، ماهي بردو الناس الحلوه بتفارقنا ف سنين مش ثانيه! لسة فاكرة كل حاجه كإنها امبارح! لسة قلبي بيعاند و لسة بيقاوح . لسة فاكرة ، لسة فاكرة ، ومش هنسى . بدعيلك قبل منامي ، ومش بعرف أنام حتى لو عايزة ، لأن ذكرياتك معايا كانت غير أي حد تاني .
لسة فاكرة كل ذكرى في طفولتي ، لسة فاكرة كل خطوة ، لسة بحط جنب صورتك صورتي! مش ناسية تحفيظك ليا للقرآن ، مش ناسية حنانك ليا ، ولا يوم ما كنت بتقول الآذان ، واسمع صوتك في المايك وقت الفجر وأحس بالأمان ، لسة فاكرة كل ثانية قضيناها زمان ، صدقني لسة فاكرة!
في الثلاثاء 02 أغسطس-آب 2022 09:22:28 م